Ahashakire ho hamudwa umuko

Mushosi amuhanula gugala wage

Guno guliri mugani muhamu bwenene ugumukolesibwa mu Kifuliiru. Gumukolesibwa ikyanya kingi higulu lyokuhanula abandu bakole. Umukolwa kwoshi kwongangaba gutangayumana no'busha. Ukushakirwa bamukolesa nga ngisi kwotukomiri, ihigembe. Abamushakirwa imwitu ikyanya kingi imuba higulu lyokuleza umuti mu muko mu kishingo kyo kukolesa ishindano. Ku kyanya umundu amuba kera ashakirwa halimuba umuko ugumudwa kiri yubo bule bamuba batula bwangaba bunini.

Ikyanya kwokuhanula abandu, guno mugani gumukolesibwa ikyanya kingi mu kutukengula nokutuhereza umwete gwo'kukola.

Ku zene guno mugani tugukolese ku biki?

Guno mugani twaloza ukugukolesa mukulalika abandu booshi abamusima indeto yiitu ne'ngingwe ku twehehe Bafuliiru higulu tukole imikolwa igatugwaasa. Uburambe buliri bunini ne'kyanya kitu kitalirir kingi. Ku yibyo tubanini ukukola mu kukolesa imisi yiitu yooshi no bwenege tukahebwa na Rurema. Ku balya abakalenga ku masomo, ku balya abayiji bingi mu Kifuliiru, tubanini ukukolesa byoshi byotugweeti na'byotuyiji tunagenderere ukuzamuka no kuzamula indeto yiitu.

Mu mikolwa mihyahya kera iyakolwa mu Kifuliiru, tugweti imikolwa mingi bwenene na guno mukolwa Tumenye Ibufuliiru guliri muguma yayo. Ayivugwe Kabemba akagwajika umukolwa Tumenye Ibufuliiru galiliri nga mahizo naho. Ayivugwe Kabemba aliri mwana wa mukaya ke'Bufuliiru akamuhamgalwa Kahamba. Akabutirwa yo, anamala ikyanya kitali na kinini na zene akola mushwira uwakushaja. Ayivugwe amusima bwenene byoshi byo buhinga buhyahya. Ikyanya akasalira higulu lye'ndeto yiitu Kifuliiru yehe nga Mufuliiru, anayiji gwana kwo imyazi ye'mwitu italiri mingi ku Internet. Kyo kyanya akatondeza ukusalira higulu lyo'kukola naye atabule, akole ikindu ikyanyangayiji yiyongera ku gindi mikolwa yooshi kera ikakolwa mu ndeto yiitu.

Nga ngisi kwo guno mugani guliri, akatondeza ukukola bwijabwija. Mu bindu aliloziziz ukuhika kwohe, alilozizi ukushoboza abandu boshi abangaloza igambo lye'Kifuliiru ku Internet banalilonge no'bweshu. Byo bikatuma agayisaliza bwenene ukudeta kwo yugu mukolwa gube kuno kwogukola. Amusima ukuyandika mu ndeto zitali ninini, byanatuma agasalira ku Kifuliiru nakyo. Ukuhisa ku zene, luno siku guno mwazi gwayandikwa (03/08/2021), amagambo gooshi agaliri hano yehe yekagayandika. Akasomera byo'buhinga buhyahya byanamugwasa bwenene ukudeta kwo akolese byakayigirizibwa na'byoshi agayiyigiriza yenene halinde ibitali na binini wangakoli bilonga ku Internet.

Magambo ge Kifuliiru ku Google

Wangamenya bingi hingulu lyage ne gindi mikolwa yage yage ku namuyehuulo wage hano>.

Wangaba ugweti umukolwa nawe? Tuyandikire utumenyese. Lenga ku Chat yaha haluhande kandi li ulenga hano>>. Kongwa.