Tuyandike indeto yiitu Kifuliiru

Mundu amuhuma ku Kina bwenge

Tuli Bafuliiru, tumuganula tunamusima ukuganula indeto yiitu Kifuliiru. Ikindu kihamu bwenene ku ngisi ndeto kuli kulonga abamugiganula no kugiyuvwiriza. Ingingwe, ku kyanya iyo ndeto ingweti abamugiyandika.

Ku twehe Bafuliiru, tumusima ukumenya bingi mu ndeto yiitu. Ka tumusima ukuyandika byo tuyiji? Kino kiliri kibuzo kihamu bwenene. Tuyandike indeto yiitu, tugigalise. Indeto itagweti ibiyandike yanganyota inayibagirwe.

Hano hashi ly'izuba indeto kera izikayibagirwa ziliri nyingi, hanakiri ne'zindi izigweti zigashonga iwakuyibagirwa. Mu yizo ndeto izigweti zigashonga iwakuyibagirwa no kusherebera, ne'ndeto yiitu iliri muyizo. Tubanini ukukola ijoro n'izuba no kukola bukayu bwenene higulu tukize indeto yiitu itasherebere nayo. Mu byotubanini ukukola, ukuyandika indeto yiitu kiliri kind kihamu bwenene kyotubanini ukuyilagala mwo tweshi kandi li ku bwingi. Wehe wewangaba umusima indeto yiitu, wangaba umuyifwija bwenene ukubona indeto yiitu kwe'gazamuka ingingwe, tukole, tuyandike, tuganule na tukizi yuvziriwa indeto yiitu.

Ikyanya tumuyandika indeto yiitu, tumuba tumubyala imbuto izigayamaho.

Tuyandike indeto yiitu.

Biki twangakolesa mu kuyandika indeto yiitu

Mu siku za zene, ibyotwangakoolesa mu kuyandika indeto yiitu biliri bingi bwenene. Ubuhinga buhyahya bugwasanya bwenene ukunovohya umukolwa gwo'kuyandika.

Mu byoshi twangakolesa twangadeta :

Kina bwenge no lujegejo(telephone)

Ikina bwenge kiliri kyuma ikigweti ubushobozi mu kyohe bwo kutugwasa ukuyandika imyazi no kugibika ku kyanya ikitali na kinini. Ulujegejo nalwo lwangatugwasa. Haliko ingigwe kina bwenge.

Kuyandika ku karatasi

Ikyanya umundu atagweti ikinabwenge kandi li i telephone, angakolesa ngisi kwo bingi bakayandika imyazi mu kukolesa ikaratasi ne kalamu. Ino iliri gindi njira imukolesibwa bwenene.

Hayi twangayandikira imyazi

Ku zene ibindu bingi kera byagirwa binovu na'bandu bagenderiri ukubinovohya. Ngawangaba ulozizi ukuyandika imyazi kandi li ikindu kyoshi ikyangahikira abandi bandu bingi, ahija ukuyandikira ku yikyo kinyerere haliri ku Internet. Mu bigakulikira tugadeta bwenene higulu lya ngisi kwo twangakolesa i Internet mu kudeta kwo itugwase ukuzamula indeto yitu, imikolwa yitu no kuzamula byotuyiji.