Tusome i Kifuliiru, namuyehuulo muhyahya mu Kifuliiru
- Ayivugwe Kabemba
- Dec 26, 2022
- 1 min read
Mu kihugo kya zene abandu booshi bagweti abgalooza ngisi kwo bangazamuuka mu njira zooshi. Bingi bagweti bagakola ijoro n'izuba ukudeta kwo bahike hala.
Ku Mufuliiru naye, hoshi ngisi munda aliri, inzaliro ziliri nyingi. Ukuba Umufuliiru atakalonga ngisi kwo angayandika imyazi kandi li ibindu byage mu myaka ikalenga, zene ngisi booshi abakolibishobwiri bagweti bagakola kwoshi kwo bayiji na kwoshi ngisi kwo bayiji higulu lyo'kudeta kwo tuzamuule indeto yitu.
Mu bindu ibyangatuma indeto igazamuuka, haliri ukugisoma na kuguma na yukwo ukugifundisha abandi bandu. Ndayo ndeto iyangalama ku kyanya beneyo batagiyiji na ku kyanya ibibusi bitu ibigweti bigayija bigabutwa bitayiji iyo ndeto, bitamugiganuula bitanamugiyandika. Yibyo biliri bindu bihamu bweneene.
Twabona mwenewitu wa Ayivugwe Kabemba ashubi kola ugundi mukolwa aberangira Tusome i Kifuliiru. Yugo mukolwa aliri namuyehuulo muyandike mu Kifuliiru. Uno mwenewitu ayamihebuzagya mu kukola mu Kifuliiru. Amusima ukukola ibigaba biyandike mu Kifuliiru. Uyo namuyehuulo amukola higulu lyo'kudeta kwo tuluze ibiyandike mu Kifuliiru. Inzaliro zage ziliri nyingi nga ngisi kwo tubwini higulu ku kyanya kyoshi angaba ngahulisiri hatamubula ikindu kihyahya amuyiji tuyereka. Ku yibyo, buliri bushambale buhamu na' malega mingi bweneene ukubona twangaba tugweti umwana we' Kaya ushobwiri ibindu bitali na binini anabe asiri ukukola mu Kifuliiru na higulu lye' Kifuliiru, tumuhunire agenderere halinde ahike hala. Ku kyanya agaba ahika hala, na nitu tugaba tugweti tugagenderera. Yugo mukolwa Tusome i Kifuliiru mwangagubona hano.
Tuyegererage ku bwingi, tusome indeto yitu Kifuliiru.
댓글